فيما يلى عرض لنص كلام الانبا بيشوى الرجل الثانى فى الكنيسة والمرشح لكرسى البابوية وذلك بعد تفريغ التسجيل الصوتى نظرا لأهميته الكبيرة بالنسبة للمسلمين والنصارى على حد سواء , والان مع نص الكلام الحرفى للأنبا بيشوى سكرتير المجمع المقدس
“من ضمن المندسين فى الكنيسة الأرثوذكسية القمص زكريا بطرس ,واحد باعت لنا سؤال بيقول ما هو موقف الكنيسة القبطية من أبونا زكريا بطرس على الرغم من أن كل ما يقوله نحن نؤيده , شوف الخطة اللى بيعملها هو لما بتتوقف عن الخدمة بأمر من قداسة البابا قبل كده ثمان سنوات او تسعة ,تسعة سنين اللى هما من سنة 1976 إلى سنة 1985 أتوقف , كان أتوقف ليه ساعتها لأنه عبارة عن مؤسسة خمسينية بروتستانتية فى قاعة مارى مرقس بكليوباترا ,قعد معانا فى السجن شوية وطلعنا من السجن قعد يقابلنا ويقابل قداسة البابا , وكلفنى قداسة البابا مع نيافة الأنبا بنيامين إننا نفحص أموره , وبعدين طلب منه انه يألف كتب ترد على العقائد الغلط اللى بينادى بيها فألف كتابين واحد ضد التكلم بالألسنة على الطريقة الخمسينية مش على الطريقة الرسوليه اللى هى فى العصر الرسولى اقصد مش دلوقتى والكتاب التانى عن بدعة الخلاص , وبعد مطلع الكتابين دول حوله البابا على المجلس الإكلريكى العام , فحصنا الكتابين وقدمنا توصية لقداسة البابا وتوزعت فى المجمع المقدس للعلم وصلى مع قداسة البابا ورجع للخدمة تانى , يعنى أنا شخصيا اللى كتبت بخط إيدى توصية عودته للخدمة بتكليف من قداسة البابا كنائب للبابا فى المجلس الإكلريكى العام أصل تفتكروا ان فيه عداوة بينى وبينه , واى عضو فى المجمع المقدس حضر جلسة سنة 85 او 86 مش فاكر واحدة من الاثنين لا متأسف أنا مسكت المجلس الإكلريكى 86 يبقى التقرير اللى أدمناه لـ 86 او 87 وبالتالى يبقى السنة اللى أتوقف فيها 1978 يعنى يبقى هو اتوقف من 78 الى 87 تسع سنين , اللى حصل آه أنا مفيش بينى وبينه عداء شخصى هو ليه ملف واى أب من الآباء ممكن يشوف التقرير اللى أنا كاتبه بتوصية لعودته للخدمة لكن هذا الرجل متحالف مع البروتستانت ومتحالف مع جيث ماير دى هى اللى بتسايره ودلوقتى شعبنا مبسوط أوى من اللى بيقوله علشان اه بينفس عن الكبت اللى عمله فيهم الشيخ متولى الشعراوى على مدى طول مدة حكم السادات وبعد حكم السادات بشوية لغاية ما قداسة البابا عمله عملية ترويض وبعدين يقولك آه إحنا سنرد على الهجوم الإسلامي , هترد على الهجوم الإسلامى آه ده أنتا هتهيج علينا المسلمين فى العالم الإسلامى والعربى دلوقتى يقعد يمسك فى الإسلام ويشرح فيه وهجوم على نبى الإسلام بطريقة خارجة عن الأدب , ليه كده أنا لما رديت على الشعرواى كنت برد على هجوم ضد المسيحية لكن دوكها زكريا بطرس مش بيرد على هجوم موجه للمسيحية طب شوفوا هل المسيح عمره عمل الأسلوب ده , طيب ما كان فيه الهندوسية والبوذية والكونفوشوسية واليهودية اللى هيا زى الصدوقيون مثلا وكده , كل الحكاية انه رد على أسئلتهم وأقنعهم من الكتب المقدسة فى نقطة خاصة بالقيامة لكن لما لما جم علشان يرجموا المرأة التى كانت تزنى فى ذات الفعل كتبلهم خطاياهم على الأرض كل واحد يشوف خطيته هو بس ياخد بعضه ويمشى , لكن هل مسك واحد فيهم وقاله أنتا أمبارح ياللى عاوز ترجم الست دى كنت مع واحدة مش مراتك ؟ أبدا عمر ما المسيح استخدم أسلوب الفضايح إطلاقا , فهذا إهدار للتعليم المسيحى أيضا , هذا الأسلوب ليس دفاعا عن المسيحية لكنه إهدار لقيم مسيحية اخرى , لا يجوز وعلى الملأ وعلى مسمع من العالم كله حتى فى السعودية ودول الخليج , هو عاوزهم يطردوا الكنايس اللى فى دول الخليج ؟ عوزهم يقوموا يحرقوا الكنائس اللى فى مصر , وأخرتها اه؟ انتو فرحانين بيه ؟ يا شطرتك يا اللى بعاتلى تقولى أبونا القمص زكريا بطرس مش مكفيك تقول القمص حتى وتقول كل ما يقوله نحن نؤيده ؟ واحد بيقولى لماذا الكنيسة القبطية باستمرار ضد الآباء أصحاب العلم والعظات الخلافية أمثال أبونا زكريا بطرس وأبونا مكارى يونان وأبونا سمعان إبراهيم ؟ اهو واحد قاعد معاكم هنا مندس بروتستنتى خمسينى اللى باعد الورقة دى ( تصفيق ) مهم بيبعدوا مندوبينهم علشان يشوفوا المسألة أصبحت لا تحتمل النوم ولا السكوت , مهزلة على كل المستويات , أنا مش عارف الكنيسة القبطية عاملة لهم اه متغظين منها بشكل مش طايقين أن تبقى فيه عقيدة أرثوذكسية راسخة مستقرة متينه تتمسك بالأصوام وتتمسك بأسرار الكنيسة السبعة , الكاثوليك اهو بالاسم كنيسة رسولية , فين الاصوام عندهم ؟ فين سر الاعتراف ؟ كانوا عاملين له كرسى قال فى الكنايس وخلاص , تخش الكنيسة تلاقى كرسى الاعتراف بقى من ضمن الآثار اللى بيتفرجوا عليها السواح ,والزواج بغير المؤمنين والخلاص لغير المؤمنين وضاعت الكنيسة الكاثوليكية, هى فين الكنيسة ؟ فهما هيحاربوا الكنيسة الكاثوليكية ليه مهى دمرت نفسها بنفسها , لما تنادى بخلاص الوثنين وتقول إن كل إنسان يستحق الخلاص المسيحى حتى اللى مامنش بيه ولا أتعمد ودمنسيسوس مش بس 64 و65 ودمنسيوس اللى هى الرب يسوع اللى طلعت سنة 2000 من الفاتيكان أكدت نفس الكلام للأسف , مع أنى فى حصة بحث كممثل للكنيسة القبطية أنى أقولهم يا جماعة عيب كدة أمال الرسل استشهدوا ليه؟ لما غير المؤمنين هيخلصوا بدون الإيمان والمعمودية؟ إحنا مخترقين وأدى الدليل اهو وطبعا أنا عارف إن اللى باعت الورقة دى إن كلامى مش هيعجبه وهيستمر فى العناد بتاعه لكن وأنا هيهمنى آه ؟ مش قال بولس الرسول سياتى وقت لا يحتملون فيه التعليم الصحيح يجمعون لأنفسهم معلمين تستحك أذانهم وقال منك انتم ذئاب خاطفة لا تشفق على الرعية يتكلمون باقوال ملتوية ليجتذبوا التلاميذ ورائهم ؟ خليك فى اللى انتا فيه بس يوم ما هيجى دورك هتدبس مع عاطف عزيز وزكريا بطرس ومع ادوار اسحق هتدبسوا كلكم فى دوسيه واحد واللى لسه مخدش دوره هيجى عليه الدور طيب ما البابا قال الدور على ماكس ميشيل ده عمل بطرك ورسم أساقفة مجرد طالب خريج من الكلية الإيكليركية عمل بطرق ورسم أساقفة رسم أسقف لسكندرية وأسقف لشبرا ساعة ما كان البابا فى التحفظ أو لمسمع ماكس مشيل أن الحديث على ماكس ميشيل عمل حديث مع المصور أو أخر ساعة وقال مفيش حاجة بينى وبين البابا وأنا معملتش بطرك ولا حاجة وقعد يكذب وقعد يلف ويدور , ممكن الواحد يسال ويقول طيب ما لبابا قال الدور عليه ومحصلش اى شئ ليه ؟ لأننا انشغلنا شوية فى الصراع مع الادفنتست واتشغلنا شوية فى شوية حاجات تانى فكون انه لسه مدخلش فى فى المفرمة أو الشواية (تصفيق ) يبقى خلاص يعنى فلت ؟ لا لسه فيه ناس الدور جاى عليهم , هتقولى شواية هقولك آه مش إلهنا نار أكلة , هو بطرس الرسول محكمش على حننيا وشفيرا ووقعوا الاتنين ميتين , أحنا بنترفق بالضعفاء المساكين الذين ليس لهم احد يذكرهم , الحنية فى مجالات لكن فيه مواقف عاوزة موقف قوى حتى لا يحدث فى الكنيسة ما لا تحمد عقباه , هذا التحالف بين زكريا بطرس وقناة الحياة فى الدش مع شوش ماير ألا يدرك زكريا بطرس ان مستمعيه اللى معجبين بيه كلهم فى مصر وفى بلاد المهجر الأقباط هيسمعوا الست دى هو عارف طبعا عارف وعارف ان دى عملية غسيل مخ هتشتغل وهيحقق هدفه والطعم هو الهجوم على الإسلام ونحن لا ينبغى ان ننخدع بهذا الأسلوب الماسخ , زكريا بطرس حكم المجمع المقدس فى جلسة السنة الل فاتت برئاسة قداسة البابا بأنه ممنوع من التعليم ومن ممارسة الكهنوت , يبقى هيلبسلى جلبية المصطفى علشان يعرف يخترق الكنيسة , اه اللى هيتسفيده ؟ هجومه على الإسلام من اخطر الأمور التى تهدد مستقبل الكنيسة والمسيحية فى الشرق الأوسط وفى العالم الإسلامى كله, ولولا ان الناس كلهم معندهمش قنوات فضائية ودش , انتو كنتوا شوفتوها ولعت , ولذلك أنا اعتقد انه هيجى وقت لازم الكنيسة القبطية هطلع بيان رسمى أن هذا الأسلوب وهذا التجريح لم يكن أسلوب السيد المسيح ولا تقبله الكنيسة القبطية , بس البيان لازم ينطبخ فى المطبخ ويستوى ويعيش فى الأذهان , احنا لما اجتمعنا فى المجمع المقدس الآباء الأساقفة كلهم كانوا متوجسين خشية ردود الفعل وحسين بخطورة الموقف , قلت لهم استنوا شوية وبلاش نتحرك دلوقتى الى المجمع المقدس كان مجرد راى يعنى بلاش خلينا لما نشوف إبعاد القصة اه وخلينا لما ندرس خريطة المعركة اه وردود الفعل على كل الاتجاهات آه علشان لما نطلع بيان طبعا قداسة البابا هو اللى هيصيغه فى الوقت ده يبقى مطبوخ ومسبوك صح يعنى معد أعداد سليم , أنتا النهاردة من ضمن الأفكار اللى وردت علينا واللى اتقالت النهاردة إننا لو طلعنا بيان ضده ( المقصود زكريا حرامى العلقة ) شعبنا ليه مادركش خطورة اللى هو بيعمله فممكن يقولوا هى الكنيسة ضد اللى يدافع عن المسيحية وعن الهجوم الإسلامى عليها , مهم مش فاهمين الفرق بين الدفاع عن المسيحية و الهجوم على الإسلام , اذن المسالة لسه الأول عاوزة تجهيز للقاعدة الشعبية , ويبقى انتو كاقيادات مطلوب منكم تبداو تفهموا الناس اسلوب السيد المسيح اه , امسك الأربع أناجيل صراحة كده , ولذلك أيها الأحباء نحن نواجه خطرا داهما وكل المصايب اللى أحنا بنواجهها الاريوسية طلعت من بطن البروتستانت ,شارلى ستاز رافل بروتستانتى انضم إلى السبتيين ثم اخترع بدعة شهود يهوة وليم ميلو والآن وايت بروتستانت انضموا إلى السبتية او قبل ما كان فيه سبتية الى المعمدانية والى معمدنيو اليوم السابع فبقوا مجيئيوا اليوم السابع ,جوزيف سمث طلع من بطن البروتستانت وكل الخمسنين دول اللى بنتكلم عليهم إذن البروتستانتية هى معمل تفريخ لكل البدع والهرطقات فى هذا العالم المعاصر , وبعد كده نستخف بان الناس تتفرج على الست دى جيث ماير وتقول أنا بغير الفستاين بتاعتى علشان شكلى لازم يبقى جميل وتقعد تتنطط قدام الكاميرا “
هولاء عاوزين فتنة ولكن حماة الإسلام باقون